Rien n’vaut nou coin
Alors, mes gins, les vagances alles sont bien passées ? Mi, cha peut d’aller, j’a été m’arposer (enfin, j’croyos) eine quinzin-ne d’jours à mon d’ches Dromadaires, nan, pas dins l’Sahara………..dins la Drôme. Que pays : ch’est plein d’tourisses, i fait eine caleur pont possipe, j’m’in vas vous raconter cha et j’vous préviens, cha n’va pont ête trisse !
Pour commincher, j’n’a pont voulu printe m’carette, alors in z’avons pris ch’train : pour l’TGV, rin à dire, ch’est agréape, in est bien assis et in s’arposse. Mais seul’mint, pour aller à nou chalet, i avot l’TER (Toujours En Rade, nous in dit Toudis In Raque) : pont d’plache, ches jon-nes i printent tous ches banquettes, i fait caud à suer des gouttes com-me min poing et ch’train i faijot toutes ches gares. In est arrivés com-me des ébeués in s’dijant qu’cha allot passer : ah ouette, in z’avons cru rintrer dins ein four, cha comminchot bien !
Arrivés sus plache, dins ch’campinge , in s’a d’mandé si in étot cor in France : i avot qu’des Belges, des z’Hollandais et des Inglais. Nous, cha nous érot pont déringés, mais là, eine pitite parinthèsse : dins ches Belges, ches Wallons i parlottent français, mais alors ches Flaminds, pardon ! Ch’étot la java tous les soirs et quand t’avos l’malheur d’leu dire quèquecosse, i répondotent toudis « Pas comprendre ».
Par conte, ches Inglais, pont un mot pus haut qu’l’aute, forchémint, i n’parlottent pont à personne vu qu’leu français i étot fort réduit et, com-me mi je n’pale inglais que dsous la torture, o veyez d’ichi l’traval !
Mais l’coq, ch’est ches z’Hollandais : i sont in pays conquis, i printent l’piscine pour eux tout seuls (i n’a min-me plus d’ein qui manqué d’sauter dsus m’tiête), après, i s’installent dins ches douches et là, té peux attinte ein bon momint avant de t’laver, sans parler d’ches vécés, à croire qui printent cha pour des cabines d’relaxation ; quand i pal’tent (mi, j’diros putôt quant i z’aboitent), té cros toudis qu’i z’ont un haut-parleur ; dins ches magasins, i passent devant ti sans s’gêner, leus jon-nes i sont toudis fourrés tout partout à mon des z’autes, min biau-frère i a mei-me artrouvé eine tiote qui s’avot installé dins sin fauteul et allumé s’télé ! Dins ch’campinge, i faut rouler duch’mint :eux, i n’doivent sur’mint pont savoir lire ches chiffes, ch’est simpe, si y a un nuache d’poussière, ch’est un NL (ch’est leu plaque d’auto) qui fonce comme si i avot l’fu quèquepart ! O pouvez m’croire, mes gins, ch’est pont des cacoules.
O z’allez sur’mint vous dire : cha y est, ch’Raymond i a tourné racisse, i n’y manquot pus qu’cha ! Ben nan, mais avouez qu’y a es jours, ch’est dur d’ête tranquile dins sin prope païs.
Heureus’mint, y avot ches ch’timis : i sont tout partout. Un jour qu’bien installé à eine terrasse in buvot ein demi, j’intinds ch’patron dire : « Que temps d’tchien, min patalon i colle à mes fesses ! », aussi sec, j’ingache la conversation, in patois naturell’mint, et i m’dit : « Mi ? J’sus d’Auchel », j’avos dégotté un compatriote à Alfred, l’responsape ed nou revue « Ches Vints d’Artois » ! Un peu pus tard, à l’pharmacie, ch’ti qui m’sert i dit : « A entendre votre accent, vous n’êtes pas du coin » et comme j’li dis que viens de l’Punoy, tout près d’Béthune, v’là-t-y pas qu’i m’répond : « Ch’connos pont, j’a travaillé à Allouanne (Allouagne) ! » (Pour cheux qui n’connaichent pont min coin, ch’est deux villaches côte à côte). J’vous l’dis, mes gins, ches ch’timis i sont cor bien là.
Et dins ch’camp, j’vouos arriver un 62, j’li fais sinne, in parle, i étot d’Saint Omer et, in plus, ch’est un péqueux, quoi d’mander d’plus ? Et pis j’a cor fait ein nouviau camarate, qu’j’appelle ch’brayou pasqu’i resse à Bray sur Somme.
Final’mint, j’vous jure qu’in étot bien contints d’artrouver nou pays, au moins ichi, in peut mette sin nez a l’cour sans ête rouche comme eine tomate et sans intinte parler des lanques à coucher déhors !
Les vagances au loin, ch’est bien, mais j’cros bien qu’l’année prochain-ne, in va faire comme grammint : direction la Côte d’Opale in espérant qu’i va cor y rester eine paire de ch’tis, histoire d’s’amuser ein tiot peu !
